അല്‍പ്പമൊന്നു ശ്രദ്ധ വെച്ചാല്‍ പ്ലാസ്റ്റിക്കിന്റെ ഉപയോഗം ഗണ്യമായി കുറച്ച്‌ പ്രകൃതിസംരക്ഷണത്തില്‍ നമ്മുടേതായ പങ്ക്‌ വഹിക്കാമെന്ന്‌ എം.ആര്‍. ഹരി ഓര്‍മ്മിപ്പിക്കുന്നു. അതിലൊരു വഴി ഭക്ഷണം പാഴ്‌സല്‍ വാങ്ങുമ്പോള്‍ അത്‌ സ്റ്റീല്‍ പാത്രങ്ങളില്‍ വാങ്ങുക എന്നുളളതാണ്‌. പാഴ്‌സലുകളില്‍ നിന്നു ബാക്കിയാവുന്ന പ്ലാസ്റ്റിക് കവറുകള്‍ അനേകമാണ്. അതുമാത്രമല്ല, ചൂടുളള ഭക്ഷണം പ്ലാസ്റ്റിക് കവറുകളിലോ പാത്രങ്ങളിലോ പകര്‍ത്തിവെച്ചാല്‍ അതു പിന്നീട്‌ വലിയ ആരോഗ്യപ്രശ്‌നങ്ങള്‍ക്ക്‌ കാരണമാവുകയും ചെയ്യും. നമ്മുടെ വാഹനങ്ങളില്‍ ഏതാനും സ്റ്റീല്‍ പാത്രങ്ങള്‍ സൂക്ഷിക്കുകയാണെങ്കില്‍ പാഴ്‌സല്‍ വഴി വീടുകളിലെത്തുന്ന പ്ലാസ്റ്റിക്കിനെ എങ്കിലും നമുക്ക്‌ ഒഴിവാക്കാന്‍ കഴിയും.